سلسلة أعمالي اليدوية الاعداد لورشة عمل

سلسلة أعمالي اليدوية

الاعداد لورشة عمل

 

قبل اسبوعين انتهيت ولله الحمد من تقديم ورشة عمل من اعدادي وتقديمي..

أنا أكون سعيدة جدا لما تكون الأشياء اللي على الطاولة كلها من اعدادي مثل  الماي والمذكرات والزينه اللي تنحط عالطاولة...

 

بورش العمل من الضروري أن تكون القاعة مرتبة والطاولات فيها لمسات تجذب الحضور ..لأن بطبع الانسان يعشق وينجذب للشي المرتب واللي يسعد النظر.

 

بالبداية حضرت البطاقات لعلب الماي وعادة كنت ألصق اسم الورشة او المحاضرة مكان الليبل الأصلي بعد ازالته..لكن هالمره غيرت الطريقة وطبعت اسم الورشة على كرت أبيض والخلفية كانت ناعمة على ورود..و ثبتهم بمطاط على عنق قنينة الماي شريتهم من المكتبة لأني ما لقيت الوقت أن أشتري المطاط الأبيض.

 

أيضا  كان في بالي أن أحط مع الملف اللي يحتوي أوراق ورشة العمل قطعة كاكاو فحبيت تكون ملائمه لباقي الأشياء عالطاولة..

طبعت أوراق ذاتية اللصق وحاولت أضبط قياسها الى أن وصلت للقياس الملائم لقطعة الكاكاو ولله الحمد كانت حلوه..

 

الشي اللي أول مره أجربه كان صناعة علبة كلينكس...كنت ناوية أروح احدى المطابع عشان أسوي علب كلينكس..لكن بما أني أحب الأعمال اليدوية فقررت أجرب أصنعها بنفسي..طلعت من الانترنت رسومات لكيفية التطبيق فجربت أسهل طريقة..ولله  الحمد كانت جدا مرتبة وحلوة  بالنسبة للتطبيق أول مرة كان شي جيد جدا وكان يحتاج حرفية عشان يكون 100%..  وحده من زميلاتي سألتني عن اسم المحل وتفاجأت انه عمل يدوي.. طبعت اسم الورشة على العلبه عشان يكون شكلها متناسق مع باقي الأشياء..

طبعا ماننسى الملف اللي يقدم للضيوف اللي يكون فيه ملخص عن مضمون الورشة وبعض أوراق العمل اللي تنحل أثناء تقديم الورشة لازم تكون أوراقة ذات خلفيه عن موضوع الورشة و غلاف الملف نفسه مطبوع عليه اسم الورشة والمحاضر ورئيس القسم والموجه/ـه و مدير /ة المدرسة..أو بالورقة الداخلية عالأقل.

 

جدا شي حلو لما تنسئل عن شي ويكون ردك انك سويته بنفسك...هالشعور أحبه وأكون فخورة فيه..

خصوصا في حفلات التفوق..أكون جدا متحمسة وسعيدة لما أسوي توزيعات عيالي بايدي ..أقدر أشتري شي جاهز وفي تشكيلات كبيرة ..لكن أحب اسوي بنفسي .. شعور حلو ماعرف أوصفه صراحه..مع العلم أن أحيانا لو بشتري جاهز يكون أرخص..لكن لأني أحب الأعمال اليدوية..وأحب لما عيالي يشوفوني أتعب عشانهم وأحبهم يشاركوني في التجهيز..

فيكون التعب ممزوج بالفرحة والمتعة..

 

الأعمال اليدوية حلوة ومفيدة وخصوصا لليهال..

 

في المواضيع القادمة اقدم تلخيص عن الورشة ان شاءالله.

 

للأسف ماعرف اضبط ترتيب الصور  فحاولوا ترتبون الخطوات

 

ودمتم,,

خلود

الكاكاو



توزيعات لحفلة التفوق ام اند امز

توزيعات ميني ماوس


 

الخلفية اللي اخترتها لعلب  الكلينكس والماي والكاكاو



ليبل لقنينة الماء

نموذج من الانترنت

 

ملف الورشة مع مؤشر كتاب